15·04·2026
Apirilak 24, 17:30: Zapiak herrian
Iazko urrian egin zen Zapiak taldearen aurkezpena herrian. Ikaztegietako emakume batzuk biltzen dituen taldea da Zapiak, bertan jaiotakoak eta kanpotik gurera etorritakoak. Aurten ere antolatu dute herriari irekia izango den saioa. Urrian herrialde desberdinetako platerak prestatu ziren. Oraingo honetan, jolasak izango dira aitzakia. Herrialde desberdinetako jolasak ezagutzeko eta jolasteko aukera izango dugu, haurrek bezain beste helduek. Apirilaren 24an, 17:30etan, plazan ikusiko dugu elkar!
09·04·2026
Jubilatuentzako irteera maiatzaren 29an
Maiatzaren 29rako irteera antolatu da herriko jubilatuentzat. Aurten, Ezkerraldera joango dira egunpasa. Hona egitaraua: 9:15 Irteera Ikaztegietako kiroldegitik. 12:00 Euskal Herriko Meatzaritzaren Museora bisita (Gallarta). 14:30 Bazkaria Leon XIII jatetxean (Zugaztieta). *Zugaztietara funikularrean igotzeko edo jaisteko aukera egongo da. Bazkalostean, denbora librea Portugaleten. 19:00 Ikaztegietara buelta.
09·04·2026
Apirilaren 17an "Egozidioa" Imanol Mendizabalen lanaren aurkezpena
Imanol Mendizabal herritarrak Egozidioa lana aurkeztuko du apirilaren 17an, 18:00etan, udaletxeko erabilera anitzeko aretoan. Nerabezarotik helduarora egindako jauzia jasotzen du lanak, eta iazko azaroan egin zuen publikoa. Orain, herrian bertan eta bizilagun duen Araitz Uria kazetariak lagunduta, Ikaztegietan aurkeztuko du lana.
08·04·2026
Apirilaren 20an etorriko da KZ Guneko arduraduna, 16:00etatik 17:45etara. Hitzordua eskatu behar da www.kzgunea.eus/eu/aldez-aurreko-hitzordua web orrian edo 945062555 telefonora deituz. Zerbitzu erabilgarriak: -Informazio orokorra -Izapideak: BakQ, Metaposta -Aurrez aurreko tutoretzak -Nabigazioa
01·04·2026
Herri langileen oposizio lehiaketarako oinarriak onartu dira
Atzo egindako udalbatzan aho batez onartu ziren zerbitzu anitzetako langileen bi plazen oposiziorako oinarriak. Gipuzkoako Aldizkari Ofizialera bidali dira gaur, eta argitaratzen direnean udaleko webgunean ere jarriko dira oinarriak, nahi duenak kontsulta ditzan. Behin Gipuzkoako aldizkarian argitaratuta, estatuko aldizkari ofizialera bidaliko dira oinarriak eta, han argitaratzen direnetik aurrera, 20 eguneko epea egongo da eskaintzak udalean aurkezteko. Azterketa teorikoa eta praktikoa izango dira, bakoitza egun batean. Euskara egiaztagirik ez duenak, euskararen gaitasun maila ziurtatzeko azterketa ere egin beharko du.
01·04·2026
Aste santuko eskaintza berezia
Iaz bezala, aurten ere eskaintza berezia prestatu da Aste Santuetarako. Apirilaren 9an eta 10ean herrian bertan izango da hitzordua, 10:00-13:00 bitartean, herriko plazan. Izena emateko: 747 472 830 edo ikaztegietahezitzailea@gmail.com. Gure Plazatxoko gazteekin ere irteera bat egingo da.
25·03·2026
"Hamaika irakurtzeko jaioak" liburuaren aurkezpena
Peru Calabaza Saban idazlearekin "Hamaika irakurtzeko jaioak" liburuaren aurkezpena egingo da martxoaren 27an, 18:00etan. Udaletxeko erabilera anitzeko aretoan.
25·03·2026
Neuromodulazio zerbitzu berria
Podologoaren zerbitzua martxan jarri den bezala, neuromodulazio zerbitzua ere martxan egongo da Ikaztegietako kiroldegiko medikuaren gelan apirilaren 14tik aurrera. Herritar baten eskaerari erantzunez, zerbitzu berritzailea izango da Ikaztegietan. Beraun zentroko Maider Gonzalez herritarra eta psikologoa izango da zerbitzu hori bideratuko duena, eta zerbitzua bera aurkezteko hitzaldia emango du Ikaztegietan, apirilaren 14an, 18:00etan, udaletxeko erabilera anitzeko aretoan.
17·03·2026
Zuhaitzen mozketa lanak: apirilaren 7tik aurrera
Apirilaren 7an hasita eta pare bat astez, kiroldegiaren eta trenbidearen artean dauden zuhaitz batzuk mozteko lanak egingo dira, gauez. Segurtasun arrazoiengatik eta Adifekin hala koordinatuta, lanak 00:00-05:00 bitartean egingo dira. Lan horien ondorioz, herritarroi egunerokoan eragingo diguten bi aldaketa daude kontuan hartzeko: 1. Kiroldegiko aparkalekua itxita egongo da lanek irauten duten bitartean. 2. Apirilaren 7tik hasita eta bi astez gauetan zarata egongo da.
05·03·2026
Aurten ere udarako ludoteka antolatuko dugu Ikaztegietako Udaletik. Ekainaren 22tik uztailaren 30era arte iraungo du, 9:00-13:00etara. 2014-2024 urte artean jaiotako haurrentzat izango da, eta 63,03€ko kostua izango du, eta gutxieneko soldataren azpiko diru-sarrera dutenek 31,51€ ordainduko dute. Izen-ematea maiatzaren 15a bitarte izango da. Begirale moduan lan egin nahi izanez gero, bidali curriculuma udala@ikaztegieta.eus helbidera. BALDINTZAK: euskara jakitea, 18 urte beteak izatea (edo aurten betetzea), haur heziketarekin zerikusia duten ikasketak izatea eta/edo aisialdirako hezitzaile edo denbora libreko monitore titulua izatea. Curriculuma bidaltzeko azken eguna: apirilak 16.
.jpg/7f34ba1c-c887-1e11-4b99-78eb7fa9a37f)
05·03·2026
Zabalik da Salto! udalekuetan izena emateko epea
Udalerri euskaldunetako gazteentzako udalekuak antolatu ditu aurten ere UEMAk, eta dagoeneko ireki da izena emateko epea. Martxoaren 31 arte izango da zabalik. Aurten, 2008 eta 2011 urteen artean jaiotako gazteek izango dute udalekuetan parte hartzeko aukera, eta bi txanda izango dira, udaren hasieran: ekainaren 23tik uztailaren 1era, eta uztailaren 3tik 11ra. Azken urteetan bezala, ibiltaria izango da ekimena: Markina-Xemeinen hasi eta, Aulesti eta Berriatua zeharkatu ondoren, Ondarroara iritsiko dira gazteak.
03·03·2026
Ikaztegietako Udalak hitzarmena sinatu du Gipuzkoako Farmazialarien Elkartearekin, sendagaiak zentzuz erabiltzeko arazoak dituzten herritarrei laguntza emateko helburuarekin. Etxez Etxeko Laguntza Zerbitzuak eta Gizarte Zerbitzuek artatutako pertsonen medikazioaren erabilera hobetzeko programa bat da, eta Ikaztegietako Udaleko etxez etxeko laguntza-zerbitzuek eta gizarte zerbitzuek artatutako pertsonen medikamentuen erabilera optimizatzea da helburua.