Ayuntamiento de
IKAZTEGIETA

EUSKARA IKASTAROAK

Udalak, AEK-rekin elkarlanean, euskara ikasteko ikastaroak antolatu ditu. Taldea osatzen bada, iaz bezala, Ikaztegietan bertan izango dira eskolak.

TARIFA: %100era bitarteko diru-laguntzak egongo dira, ikasi nahi den mailaren arabera. Ikasleak matrikula egiterakoan egin beharko du ordainketa, eta ikasturte amaieran itzuliko zaio dagokion kopurua, beti ere, asistentzia betetzen bada eta ikastaroa ondo baliatzen bada. Babesgabetasun edo zaurgarritasun egoeran dauden herritarren kasuan udalak aurreratu dezake matrikularen ordainketa osoa.

EUSKARA IKASTARO BEREZIAK GURASOENTZAT

2025-26 ikasturtean gurasoentzako euskara ikastaro praktiko bat antolatu nahi dugu eskolan. Euskara ulertzen ez duten gurasoentzat dira. Eskolak ikastetxean bertan edo udaletxean izango dira, umeak eskolan dauden bitartean, astean bi egunetan.

TARIFA: Dohainik (udalak ordaintzen du)

IZEN-EMATEA: eskolan bertan edo online (labur.eus/etorriEUS)

IRAKURLE TALDE FEMINISTA

Azken urteetako ohiturari jarraituz, ikasturte honetan ere irakurle talde feminista izango dugu Ikaztegietan. Bi hilabetez behin biltzen da taldea, liburutegian. Aurtengoan berrikuntza batekin dator, gainera: Iratxe Retolaza izango da saioen dinamizatzailea. Retolaza erreferentea da gai hauetan: literatura ikertzailea da, eta aditua irakurketa feministan.

TARIFA: Dohainik (udalak eta Gipuzkoako Foru Aldundiak ordaintzen dute)

BATERIA IKASTAROAK HELDUENTZAT

Bateriaren hastapenei buruzko ikastaroa, instrumentuarekin modu praktikoan lehen harremana izateko, baina baita maila handiagoko pertsonentzat ere, klaseak bakoitzaren beharretara egokituko baitira. Ikastaroaren helburua bateriaren oinarri orokorrak ikastea da, eta ikasleari gustatzen zaion talde bateko abestiren bat jotzea, bere ikaste-erritmora egokituta.

TARIFA: 18€ / ordua

MEKANIKA IKASTAROA

Ikastaroaren helburua da kotxeko motorrak behar dituen sistema guztien funtzionamendua eta mantenua zein den jakitea. Apunteak hartzeko materiala eta eskularruak ekartzea gomendatzen da.

TARIFA: 10€

JOSTEKO TAILERRA

Aurten irakaslerik gabe eta elkarrengandik ikasiz, musika entzun edo solasaldian gauden bitartean, josten edo puntua eta gantxiloa egiten arituko gara. Norberak nahi duen neurrian gainera, proiektu konkretu bat egiteko, Gabonak edo Inauteriko arropak prestatzeko edo ikasturtean zehar astean behin etor zaitezke. Taldearen aniztasuna baloratzen dugu, adinean, generoan, jakintza mailan... Kiroldegiko 1. pisuko gela txikian elkartuko gara.

TARIFA: Dohainik (talde autogestionatua da)

ZORU PELBIKOA KONKISTATUZ TAILERRA

Sara Majarenas fisioterapeuta eta zoru pelbikoan adituak bi egunetako tailerra eskainiko du Ikaztegietan, zoru pelbikoa lantzeko oinarrizko ezagutza eta ariketak partekatzeko. Lehenengo saioa teorikoa izango da eta bigarrena, praktikoa.

TARIFA: Dohainik (udalak eta Gipuzkoako Foru Aldundiak ordaintzen dute)

HITZ EGIN DEZAGUN GURE ZAINTZEZ

Zaintzaren eta heriotzaren inguruko lau saiotako ikastaroa eskainiko du Olaia Arana adituak. 24 urtetik gorako lan esperientzia du Aranak eta, saio praktiko eta parte-hartzaileen bidez, gizarte ongizatea eta autonomia bilatzen ditu ikastaroetan.

Programaren helburu nagusia da herritarrak sentsibilizatzea beren etorkizuneko zaintzak planifikatzeak duen garrantziaz, pertsona bakoitzak bere osasunarekin, ongizatearekin eta ingurunearekin zerikusia duten erabakiak hartzerakoan rol aktiboa har dezan, bereziki mendekotasun- edo hauskortasun-egoeretan. Parte-hartze saioen bidez, informazioa eta tresnak ematen dira hausnarketa sustatzeko eta erabaki informatuak eta arduratsuak hartzea errazteko.

TARIFA: Saio bat 5€ / 4 saioak 15€ / TARIFA SOZIALA: Dohainik

*Kopuru minimo bat apuntatzea beharrezkoa izango da ikastaroa sortzeko. Izen-ematea bukatzen denean jakinaraziko dugu.